दाहाल–नेपाल पक्षीय नेताहरू सभामुखसँग छलफलमा

काठमाडौं– प्रतिनिधिसभाको बैठक बस्नुअघि राजनीतिक दलहरू आन्तरिक रुपमा परामर्श गरिरहेका छन्।

अपराह्न ४ बजे बस्ने प्रतिनिधिसभाको बैठकमा कसरी प्रस्तुत हुने भन्ने विषयमा नेताहरू आन्तरिक छलफल गरिरहेका छन्।
नेकपाको दाहाल–नेपाल पक्षले भने सभामुख अग्निप्रसाद सापकोटासँग छलफल गरिरहेको छ। 

सिंहदरबारस्थित सभामुखको कार्यकक्षमा नेताहरु छलफलमा रहेको एक नेताले जानकारी दिए।

उनका अनुसार अध्यक्षद्वय पुष्पकमल दाहाल, माधवकुमार नेपाल, वरिष्ठ नेता झलनाथ खनाल, प्रमुख सचेतक देव गुरुङ र नेता कृष्णभक्त पोखरेलले सभामुखसँग छलफल गरिरहेका छन्।

प्रधानमन्त्री केपी शर्मा ओलीले पुस ५ मा विघटन गरेको संसद् सर्वोच्च अदालतले फागुन ११ गते पुनःस्थापना गरिसकेको छ।

सर्वोच्चको परमादेशले १३ दिनभित्रमा प्रतिनिधिसभाको बैठक आह्वान गर्न भनिएको थियो। सोहीअनुसार आज प्रतिनिधिसभाको बैठक बस्न लागेको हो।

दाहाल–नेपाल पक्षले प्रधानमन्त्रीविरुद्ध अविश्वासको प्रस्ताव ल्याउने बताए पनि औपचारिक निर्णय भइसकेको छैन। कांग्रेस र जसपाले ठोस निर्णय गरी नसकेका कारणले पनि दाहाल नेपाल पक्षले पनि के गर्ने भन्ने तय गरिसकेको छैन।