तीन बुँदे सहमति पालना गर्न प्रतिबद्ध छाैं : विप्लव

काठमाडौं– नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ ले सरकारसँग भएकाे तीन बुँदे सहमति पालना गर्न आफ्नो पार्टी प्रतिबद्ध रहेको बताएका छन्। 

सरकारसँग सहमतिपछि शुक्रबार राजधानीको राष्ट्रिय सभामा आयोजित समारोहमा सम्बोधन गर्दै उनले भने, ‘हामी यसलाई पालना गर्छौं। यसमा कसैले कुतर्क गर्न आवश्यक छैन।’

उनले कम्युनिस्टहरु विद्रोहका योद्धा मात्र होइनन् शान्तिका दूत पनि रहेको बताए। उनले अन्य कम्युनिस्ट पार्टीसँग हातेमालो गरेर अघि बढ्न पनि तयार रहेको बताए।

 विप्लवले देशका प्रमुख मुद्दाहरुबारे जनतालाई फैसला गर्न दिनुपर्ने बताए। उनले भने, ‘नेपाली जनतालाई निर्णय गर्न दिनुपर्छ। जनता के चाहन्छन् भन्ने कुरो जनताले फैसला गर्न पाउनुपर्छ।’

उनले भने, ‘यो सहमति सरकार, नेकपा र केही नेताहरुबीच मात्रै होइन, यसलाई स्वाधीन देश, दीर्घकालीन स्थिरता, समृद्धिको आकांक्षा पूरा गर्ने सपना हो।’

मृत्युको नजिक पुगेर नफर्किएका कम्युनिस्ट नेता कोही नरहेको  विप्लवको भनाइ छ।

उनले सहिद परिवारलाई जे सपना देखाएर कम्युनिस्ट आन्दोलनमा लागेकाे हाे त्यसलाई आफूले पूरा गर्ने अठोट गरे।

विप्लवले बेपत्ता, घाइते र अपांग योद्धाहरुका चाहना पूरा गर्ने प्रतिबद्धता जनाएका छन्। उनले आफ्ना १५० भन्दा बढी कार्यकर्ता जेलमा रहेको बताए।

उनले भने, ‘अब सबै कमरेडहरु छुट्नेछन् र हामी मुक्त आकाशमा विचरण गर्नेछौं।’

विप्लवले सहमति जुटाउन सक्रिय वार्ता टोलीका सदस्यहरूलाई बधाई दिए। उनले वार्ताका लागि विभिन्न ठाउँबाट भूमिका निर्वाह गर्ने सुरक्षा निकाय, कानुनविद्, पत्रकार लगायतलाई पनि धन्यवाद दिएका छन्।