अब शान्तिपूर्ण राजनीतिबाहिर कोही रहेन : मन्त्री ज्ञवाली 

कठमाडौं– परराष्ट्रमन्त्री प्रदीप ज्ञवालीले शान्तिपूर्ण राजनीतिभन्दा बाहिर कोही नरहेको बताएका छन्। 

नेत्रविक्रम चन्द विप्लव समूहसँगको सहमतिपछि ज्ञवालीले अब कोही पनि राष्ट्रिय एकता,संविधान र शान्तिपूर्ण राजनीतिबाहिर नरहेको टिप्पणी गरेका हुन्। 

पृथकतावादका पक्षधर सीके राउत र सशस्त्र गतिविधिमा संलग्न विप्लवलाई शान्तिपूर्ण राजनीतिमा ल्याउनु महत्त्वपूर्ण उपलब्धि भएको उनले बताएका छन्।

‘पृथकतावादका पक्षधर सिके राउत राष्ट्रिय एकता र संविधानको मूल प्रवाहमा समाहित हुनु र सशस्त्र गतिविधिमा संलग्न विप्लव समूह आफ्ना राजनीतिक क्रियाकलाप शान्तिपूर्ण रूपमा सञ्चालन गर्न सहमत हुनु महत्त्वपूर्ण उपलब्धि हुन्,’ ज्ञवालीले ट्विटरमा भनेका छन्,  ‘अब कोही पनि राष्ट्रिय एकता, संविधान र शान्तिपूर्ण राजनीतिबाहिर रहेन।’

उनले यो महत्त्वपूर्ण उपलब्धिको मुख्य श्रेय प्रधानमन्त्री ओलीलाई जाने बताएका छन्।