नेपाली चार फुटबल खेलाडीलाई एन्फाको बिदाइ, आज पाकिस्तान जाँदै

काठमाडौं – महिला च्याम्पियनसिप खेल्नका लागि पाकिस्तान जाने राष्ट्रिय महिला टिमका चार खेलाडीलाई अखिल नेपाल फुटबल संघ(एन्फा)ले बिदाइ गरेको छ।

राष्ट्रिय फुटबल टिमकी गोलकिपर एन्जिला तुम्बाप्पो सुब्बा, डिफेन्डर गीता राना, मिडफिल्डर सरु लिम्बू र फरवार्ड अनिता केसीलाई बिहीबार बिदाइ गरेको हो।

उनीहरु आज पाकिस्तान प्रस्थान गर्दैछन्।

नेपाली चारै खेलाडीले त्यहाँ समूह बी मा रहेको मासा युनाइटेड फुटबल क्लबबाट खेल्ने छन्। मार्च ८ बाट अप्रिल ३ सम्म चल्ने प्रतियोगितामा २० टिमको सहभागिता छ।

२० टिमलाई चार समूहमा विभाजन गरी खेलाइने छ। जसमा नेपाली खेलाडी सम्मिलित टिम मासा समूह बी मा छ।

उक्त समूहमा साविक उपविजेता कराँची युनाइटेड, कराँची एफसी, एचईसी र सैलकोट समावेश छन्।

प्रतियोगितामा मासा युनाइटेडले मार्च ९, १६, २० र २३ मा खेल्ने छ। समूह चरणका विजेता र उपविजेता टिम अर्को चरणमा प्रवेश गर्नेछन्।

नेपालमा सम्पन्न राष्ट्रिय महिला फुटबल लिगमा उनीहरु सबैले विभागीय टिम एपीएफबाट खेलेका थिए। जहाँ उनीहरुले अपराजित रहेर उपाधि जितेका थिए।