रुपन्देहीमा १६ अर्बको लागतमा ‘स्पोर्ट्स पार्क’ बन्ने 

बुटवल- रुपन्देहीको तिलोत्तमा नगरपालिकामा अतर्राष्ट्रियस्तरको ‘स्पोर्ट्स पार्क’ बन्ने भएको छ।

तिलोत्तमा नगरपालिका–६ मा ६० हजार दर्शक क्षमताको स्पोर्ट्स पार्क बन्ने भएको हो। खेलकुदलाई पर्यटनसँग जोड्न यो पार्कले योगदान गर्ने अपेक्षा लिइएको छ। 

तिलोत्तमा नगरपालिका–६ को तिनाउ तटीय क्षेत्रमा निर्माण गरिने स्पोर्ट्स पार्क निर्माण सम्पन्न गर्न १६ अर्ब रुपैयाँ लाग्ने छ।

स्पोर्ट्स पार्कको गुरुयोजना  बिहीबार अर्थमन्त्री विष्णु पौडेलको उपस्थितिमा सार्वजनिक गरिएको छ। कुल ६५ बिगा क्षेत्रफलमा निर्माण हुने पार्कमा आधुनिक र प्रविधियुक्त कबर्डहल र स्टेडिएम  निर्माण गरिने छ।

पार्कमा साफमा खेलिने कुल २८ प्रकारका खेलमध्ये गल्फ र बोटिङबाहेक २६ प्रकारका खेल एकैसाथ खेल्न सकिने जनाइएको छ।

राति र दिउँसो जुनसुकै समयमा पनि खेल्न मिल्ने गरी निर्माण हुन थालेको स्पोर्ट्स पार्कमा फुटबल, क्रिकेट, व्याटमिन्टन लगायतका खेल खेल्न सकिने छ। स्पोर्ट्स पार्कको गुरुयोजना क्राउन डिजाइन एण्ड रिचर्स सेन्टर ललितपुरले तयार गरेको ईन्जिनियर सुनिल लम्सालले बताए। 

१० हजार सवारी साधन पार्किङ गर्न मिल्नेगरी गुरु योजना बनाइएको तिलोत्तमा स्पोर्ट्स पार्क निर्माण समितिका अध्यक्ष दीपक पाठकले बताए। १० वर्षमा निर्माण सम्पन्न गर्नेगरी गुरुयोजना तयार गरिएको छ।