नाटकीय जितसँगै बार्सिलोना कोपा डेल रेको फाइनलमा

काठमाडौं– सेभियाविरुद्ध नाटकीय जितका साथ स्पेनिस क्लब बार्सिलोना कोपा डेल रेको फाइनलमा प्रवेश गरेको छ।

बुधबार राति सम्पन्न दोस्रो लेगको सेमिफाइनल खेलमा उसले ३–० गोलको जित निकाल्दै समग्रमा ३–२ गोलको अग्रताका साथ फाइनलमा प्रवेश गरेको हो।

यसअघि सम्पन्न पहिलो लेगको खेलमा सेभियाले २–० गोलको जित निकालेको थियो। तर बुधबार रातिको खेलको ११ औं मिनेटमा गोल गर्दै ओउसमान डेम्बेलेले बार्सिलोनाका लागि अग्रता बनाएका थिए।

त्यसपछि खेलको ७२ औं मिनेटमा सेभियाले पेनाल्टीको अवसर पाए पनि बार्सिलोनाका किपरले त्यसलाई सहजै बचाएका थिए। गोल गर्ने महत्वपूर्ण अवसर गुमाएपछि उसले थाप गोल गर्न सकेन।

यता खेलको इन्ज्युरी समयमा एन्टोनी ग्रिजम्यानले दिएको पासबाट पिकले गोल गरेपछि बार्सिलोनाले गएरातिको खेलमा दुई गोलको अग्रता बनायो।

पहिलो लेगको खेलमा सेभिया समान दुई गोलले अघि भएका कारण निर्धारित समयसम्म बराबरी मात्र भयो। यसकारण खेलमा अतिरिक्त ३० मिनेट थप गरियो।

समय थप गरिनुअघि नै सेभियाका फर्नान्डोले इन्ज्युरी समयमा डबल यल्लो कार्ड पाएपछि उनी मैदानबाट बाहिरिएका थिए।

१० खेलाडीमा सीमित सेभियाको फाइदा उठाउँदै मार्टिन ब्रेथवेटले खेलको ९५ औं मिनेटमा गोल गरे। यससँगै बार्सिलोनाले समग्रमा दुई खेलमा ३–२ गोलको अग्रता बनायो। र, यससँगै खेल जित्यो।

यता गत समरमा मात्र बार्सिलोनाबाट धपाइएका लुड डि जोङले पनि खेलको १०२ औं मिनेटमा रातो कार्ड खाँदै मैदानबाट बाहिरएका थिए।