गोंगबु हत्याकाण्ड : कल्पनालाई आजीवन कैद, छोरीलाई सफाइ

काठमाडौं– काठमाडौंको गोंगबुमा गत साउनमा भएको हत्याकाण्डकी आरोपी कल्पना मुडभरी पौडेललाई काठमाडौं जिल्ला अदालतले आजीवन काराबासको सजाय सुनाएको छ।

न्यायाधीश राजेन्द्र अधिकारीको इजलासले हालै उनलाई आजीवन काराबासको सजाय सुनाएको हो।

मुलुकी फौजदारी संहितामा ज्यानसम्बन्धी कसुर गर्नेलाई जन्मकैद अर्थात् २५ वर्ष कैद हुने व्यवस्था भए पनि क्रुर यातना दिई वा निर्ममतापूर्वक ज्यान मारेको पुष्टि भए आजीवन काराबासको सजाय हुने व्यवस्था छ।

गोंगबुको गणेशस्थान नजिक गत साउन २५ गते दाङका कृष्णबहादुर बोहराको विभत्स हत्या भएको थियो।  कल्पनाको कोठामा गएका बोहराको राति हत्या गरी टाउको र खुट्टा झोला र जिउ सुटकेसमा राखेर सडकको छुट्टाछुट्टै स्थानमा फालिएको थियो।

उक्त घटनामा संलग्न भएको आरोपमा प्रहरीले कल्पना र उनकी छोरीलाई पक्राउ गरेर ज्यानसम्बन्धी मुद्दा चलाएको थियो। घटनामा छोरीको भने संलग्नता नदेखिएकोले अदालतले सफाइ दिएको छ।