ट्रकले कार र मोटरसाइकललाई ठक्कर दिँदा २ जनाको मृत्यु 

विराटनगर- पूर्व–पश्चिम राजमार्गअन्तर्गत झापाको कनकाई नगरपालिका–४ मा बुधबार दिउँसो भएको सवारी दुर्घटनामा २ जनाको मृत्यु भएको छ। दुर्घटनामा ४ जना घाइते भएका छन्।  

ट्रकले कार र मोटरसाइकललाई ठक्कर दिएको थियो। को १ ख १६८४ नम्बरको ट्रकले ओभरटेक गर्ने क्रममा विपरीत दिशाबाट आउदै गरेको प्र १–०१–००१ च ०१६७ नम्बरको कार र प्र १–०१–०१३ प १७८३ नम्बरको मोटरसाइकललाई ठक्कर दिँदा कारमा सवार सुनसरी धरान –१६ का २८ वर्षीय चालक दीपक क्षेत्री र सोलु पासाङ –१ का ३० वर्षीय दिलिप राना मगर गम्भीर घाइते भएका थिए। उनीहरु दुवै जनाको उपचारको क्रममा साँझ ५ बजे मृत्यु भएको प्रहरीले जनाएको छ। 

कारमा सवार धरान १६ का दिलिप राना मगर, उनकी श्रीमती ३० वर्षीय अन्जु मगर, ३० वर्षीय सुरेश  मगर र मोटरसाइकलमा सवार झापा शिवसताक्षी २ का ३९ वर्षीय ज्ञान बहादुर कसाई र मोटरसाइकल पछाडि सवार उनकी श्रीमती ३० वर्षीया सोनम श्रेष्ठ घाइते भएका छन्। 

घाइतेहरुको बीएण्डसी अस्पतालमा उपचार भइरहेको जिल्ला प्रहरी कार्यालय झापाले जनाएको छ। ट्रक, ट्रक चालक मोरङ विराटनगर–१५ का प्रेमबहादुर वाईबा प्रहरीको नियन्त्रणमा रहेको प्रदेश १ प्रहरी कार्यालय विराटनगरले जनाएको छ।