दिनभरको दौडधुपपछि देउवाले लगाए कोरोना खोप

काठमाडौं- नेपाली कांग्रेसका सभापति शेरबहादुर देउवाले पनि कोरोनाविरुद्धको खोप लगाएका छन्। काठमाडौंको नयाँबानेश्वरस्थित निजामती अस्पताल पुगेर देउवाले कोरोनाविरुद्धको खोप लगाएका हुन्।

खोप लगाएको तस्बिर सामाजिक सञ्जालमा राख्दै देउवाले आफूले पालोअनुसार कोरोनाविरुद्धको खोप लगाएको भन्दै अरुलाई पनि पालोअनुसार खोप लगाउन आग्रह गरेका छन्।

साथै उनले कोरोनाको जोखिम कायमै रहेकाले स्वास्थ्यका मापदण्डहरुको पालना गर्न पनि आग्रह गरेका छन्।

आगामी २३ गते प्रतिनिधिसभा बैठक बस्ने भएपछि संसद सचिवालयले सबै सांसद तथा संसद सचिवालयका कर्मचारीहरुलाई कोरोनाविरुद्धको खोप लगाउन आग्रह गरेको छ।

देउवाले बुधबार साँझ खोप लगाउनुअघि विभिन्न जिल्लाको दौडाह गरेका थिए। 

उनी चितवन तथा रौतहटमा आयोजित पार्टीका कार्यक्रममा सहभागी भएर फर्किएर साँझ खोप लगाएका हुन्।
त्यसअघि दिउँसो अरु सांसदहरुले पनि खोप लगाएका थिए।