बार्सिलोनाका पूर्वअध्यक्ष पक्राउ परेपछि प्रशिक्षक आक्रोशित

काठमाडौं– बार्सिलोनाका पूर्वअध्यक्ष जोसेप मारिया बर्टोमेउ पक्राउ परेपछि प्रशिक्षक रोनाल्ड कोम्यानले आफू आक्रोशित भएको बताएका छन्।

गएको सोमबार क्याटलान प्रहरीले बार्सिलोनामा छापा मारेर पूर्वअध्यक्षसँगै क्लबका अन्य तीन पदाधिकारीलाई पक्राउ गरेको थियो।

बार्सिलोनाबाट पक्राउ गरिएका चार जनासँग ‘सम्पत्ति, सामाजिक क्षेत्रमा आर्थिक चलखेल र अनियमितता’बारे छानबिन गरिरहेको क्याटलान प्रहरीले जनाएको हो।

क्लबको बिग्रँदो अवस्था र खेलाडीसँगको बिग्रिएको सम्बन्धका कारण बर्टोमेउले गत अक्टोबरमा राजीनामा दिएका थिए। त्यसपछि रिक्त बनेको अध्यक्ष पदका लागि यही मार्चमा चुनाव हुँदैछ।

सोमबार बर्टोमेउ पक्राउ परेपछि कोम्यानले भने, ‘यो कुरा क्लबको इमेजको लागि राम्रो होइन।’

पक्राउपछि पूर्वअध्यक्षसहित जाउमे मासफेररले बार्सिलोनाको पुलिस स्टेसनमा एक रात बिताएका थिए भने क्लबका कार्यकारी प्रमुख ओस्कार ग्रहू र कानुनी सेवा निर्देशक रोमन गोमेज सोही दिन राति छुटेका थिए।

‘जब मैले समाचार सुनेँ, क्षुब्ध बनेँ। किनभने म ग्रहु र बर्टोमउलाई राम्रोसँग चिन्छु,’ पूर्व बार्सिलोना कप्तान कोम्यानले भने।

बर्टोमेउ २०१४ मा बार्सिलोनाको अध्यक्षमा चुनिएका थिए। अब हुने चुनाबमा अध्यक्षसहित अन्य पदको पनि चुनाव हुनेछ।