गुमेको साख फर्काउँदै सिटी

काठमाडौं – म्यानचेस्टर सिटीका प्रशिक्षक पेप ग्वार्डिओलाले आफ्नो क्लब कमजोर अवस्थाबाट उठेर सानदार जितको यात्रामा पुगेको बताएका छन्।

मंगलबार रातिको खेलमा उल्भरह्याम्टनविरुद्ध ४–१ जित निकालेपछि ग्वार्डिओलाले सिटीको खेलबारे बताएका हुन्।

खेलको अन्तिम १० मिनेटमा तीन गोल गरेर सानदार जित निकालेको सिटीले डिसेम्बर दोस्रो हप्तायता लिगमा कुनै अंक गुमाएको छैन।

उसले यसकारण शीर्षस्थानमा १५ अंकका स्पष्ट अग्रता पनि बनाइसकेको छ।

डिसेम्बरमा वेस्ट ब्रोमसँग बराबरी खेलेयता सिटीले २१ खेलको अपराजित यात्रा गरिसकेको छ। 

यसक्रममा उसले लिग कपको  फाइनल, एफए कपको क्वार्टरफाइनल र च्याम्पियन्स लिगको अन्तिम १६ मा राम्रो पकड बनाएको छ।

‘युरोपको विन्टरमा हामी नर्कमा भएको महसुस गरिरहेका थियौँ। त्यतिबेला नै हामीले केही महत्त्वपूर्ण गर्‍यौं,’ उनले भने, ‘त्यसले हामीलाई यहाँम्म पुर्‍यायो। उल्लेखनीय यात्रासम्म।’

‘म सबै खेलाडीलाई प्रशंसा त गर्छु तर ताज लिभरपुलसँग छ। त्यसैले प्रिमियर लिग जित्नका लागि हामीलाई अंक आवश्यक पर्छ,’ उनले भने।

उपाधि नजिक पुग्ने क्रममा सिटीले गएरातिको खेलमा पनि नाटकीय जित निकालेको थियो।

पहिलो हाफको १५ औं मिनेटमा उल्भसका लिएन्डर डोनडोन्करले आफ्नै पोस्टमा गोल गरेपछि सिटीले अग्रता बनाएको थियो। यसैले ऊ पहिलो हाफमा एक गोलले अघि रह्यो।

तर ६१ औं मिनेटमा उल्भसका कोडीले गोल गरेपछि खेल बराबरीमा फर्कियो।

८० मिनेटसम्म बराबरी भएको खेलमा सिटीले सानदार कमब्याक गर्दै तीन गोल गर्‍यो।

८० औं मिनेटमा ग्याब्रियल जिससले गोल गरे। अन्तिम मिनेटमा रियाद महरेजलो गेल गरे र इन्ज्युरी समयमा जिससले व्यक्तिगत दोस्रो गोल गरे।

यससँगै सिटीले जित निकाल्यो।

अब सिटीले आइतबारको खेलमा म्यानचेस्टर डर्बी युनाइटेडको सामना गर्दैछ। यो खेलमा जित निकाल्न सके सिटी उपाधिको थप नजिक पुग्ने छ।

‘हामीसँग रेस्टका लागि एक वा दुई दिन मात्र छ,’ ग्वार्डिओला भन्छन् ‘यो प्रयास गरिरहन र ठूलो फड्को मार्नका लागि अवसर पनि हो।’