भन्सार छलीका सामान भित्र्याउने व्यापारीलाई कारबाही

विराटनगर– भारतबाट अवैधरुपमा सामान नेपाल भित्र्याएर बिक्री गर्ने विराटनगरका दुई व्यापारीलाई कारबाही गरिएको छ। 

वाणिज्य, आपूर्ति तथा उपभोक्ता संरक्षण कार्यालय, विराटनगरले मंगलबार अनुगमनका क्रममा विराटनगर–३ की व्यापारी उषाकुमारी साह, विराटनगर–१० की शर्मिला कोइरालालाई कारबाही गरिएको हो। 

उनीहरुले भारतबाट अवैधरुपमा कुरकुरे, लेज, डेरीमिल्क, पापड, विभिन्न ब्राण्डका बिस्कुट, भुजियालगायतका सामान ल्याएर बिक्री गरेको पाइएपछि कारबाही गरिएको वाणिज्य, आपूर्ति तथा उपभोक्ता संरक्षण कार्यालय, विराटनगरका प्रमुख सन्तोष पोखरेलले बताए। 

उनका अनुसार उपभोक्ता संरक्षण ऐन २०७५ बमोजिम शाहलाई पाँच हजार र कोइरालालाई २० हजार जरिबाना गरिएको छ। 

शाहले सञ्चालन गरेको न्यू निशा स्टोरबाट म्याद सकिएको दुई हजार १३५ मूल्य बराबरको खाद्य सामग्री नष्ट गरिएको पोखरेलले बताए। 

भारतबाट अवैधरुपमा सामान भित्र्याएर विराटनगर, धरान, इटहरी लगायतका सहरका पसलमा बिक्री गर्ने गिरोह सक्रिय रहेको गुनासो आएको प्रमुख पोखरेलले बताए। 

उनले पछिल्ला दिनहरुमा बजार अनुगमन तीव्र पारिएको बताए।