चाैपायाको कब्जामा राजधानीका सडक

काठमाडौं–  धुलो, हिलो र खाल्डा खुल्डीको समस्याबाट आजित राजधानीबासी आजकल अर्को एउटा समस्या सहन बाध्य हुँदै आएका छन् । जाम र दुर्घटना नै बढाउने गरि सहनु परेको समस्या हो पशु चौपायाको समस्या । 

मुख्य सडकको बिचमा बसेर बाटो नै कब्जा गर्दै आएका चौपायाहरुले सवारी जाम त बढाएका छन् नै दुर्घटनाको जोखिम समेत उतिनै बढेको छ । बल्खु, कलंकी, सादोबाटो, गौशला, बालाजु लगायत चक्रपथका विभिन्न सडकमा देखिएका दर्जनौ चौपायका कारण सर्वसाधरण र ट्राफिक प्रहरीले सास्ति खेप्दै आएका छन् । 

राजधानीका सडकमा सवारी साधन चलाउने हरेक चालक छाडा पशु चौपायाका कारण अजित छन् । छाडा चौपायाका कारण दिनहुँ समस्या झेल्नु परेको बल्खुका ट्राफिक प्रहरी रमेश ओझा बताउँछन् । त्यसै जाम हुने ठाउँ त्यो माथि गाई बस्तु बिच सडकमा बसिदिदा थप समस्या झेल्नु परेको उनले सुनाए । 

राजधानीमा भएका दुर्घटना मध्ये करिब २० प्रतिशत दुर्घटनाका कारक पशु चौपाया नै हुने गरेको ट्राफिक प्रहरीको दावी छ । लगभग सय भन्दा बढि छाडा पशु चौपाया राजधानीका सडकमा घुमिरहेका भेटिन्छन् । तर, काठमाडौं महानगरपालिकाले तिनलाई नियन्त्रण गर्ने र सडकबाट हटाउने काममा अग्रसरता देखाएको छैन् ।