खुला लनटेनिसको उपाधि रितिक र प्रेरणालाई 

बुटवल– बुटवलमा सम्पन्न चौथो खुला लनटेनिस प्रतियोगिताको उपाधि बुटवलका रितिक रानाले चुमेका छन्। 

मंगलबार भएको रोमाञ्चक फाइनलमा सन्तोष खत्रीलाई ६–३, ७–५ को सोझो सेटमा पराजित गर्दै रानाले उपाधि चुमेका हुन्। 

महिला सिंगलको उपाधि प्रेरणा कोइरालाले जितिन्। उनले फाइनलमा अभिलाषा विष्टलाई ६–३, ६–१ को सेटमा जित निकालेकी हुन्। 

पाँच दिनसम्म चलेको प्रतियोगिताको ३५ प्लसतर्फ कमल भण्डारीले सञ्जयप्रकाश श्रेष्ठलाई ६–२, ६–० को सेटमा पराजित गर्दै उपाधि चुमे। 

बुटवलका श्रेष्ठ पहिलोपटक फाइनल पुगेका हुन्। 

यसैगरी ४५ प्लसतर्फ चन्द्र शाही (यूएन्डमी) ले धर्म लामिछानेलाई ६–४,६–३ को सोझो सेटमा पराजित गर्दै उपाधि हात पारे। 

५५ प्लसतर्फ हिमाल शाहले मनोज राणालाई ६–७, ६–२, १०–२ को सेटमा जित निकाले। 

नेपाल टेनिस संघका केन्द्रीय अध्यक्ष ज्योति राणाले विजेता खेलाडीलाई पुरस्कार प्रदान गरेका थिए।

यसैबीच नेपालको टेनिस खेलमा महत्त्वपूर्ण योगदान दिएका लनटेनिसका प्रमुख प्रशिक्षक कृष्णराज घलेलाई नगद १८ हजारसहित सम्मान गरिएको छ।