नेपाल र अष्ट्रेलियाबीचको विश्वकप छनोट खेल अनिश्चित

काठमाडौं– आगामी चैत १७ गते हुने भनिएको फिफा विश्वकप छनोट अन्तर्गत दशरथ रंगशालामा आयोजित खेल अन्योलमा परेको छ।

एसियाली फुटबल महासंघ (एएफसी)ले कोराना महामारीका कारण स्थान परिवर्तन गर्न सक्ने भएपछि नेपाल र अष्ट्रेलियाबीचको खेल अन्योलमा परेको हो।

एएफसीले आज विभिन्न खेलको नयाँ तालिका सार्वजनिक गरेको छ। उक्त तालिकामा मार्चमा तीन खेल हुने देखाइएको छ। तर नेपाल र अष्ट्रेलियाबीचको खेलबारे एएफसीले केही भनेको छैन।

तर खेल स्थगित भने भइसकेको छैन। एएफसीले गत फेब्रुअरी १९ मा एक निर्णय गर्दै नेपाल र अष्ट्रेलियाबीचको खेल मार्चमा हुने तालिका सार्वजनिक गरेको थियो।

सो तालिकाअनुसार खेल नेपालको दशरथ रंगशालामा हुने तय थियो। तर महामारीको कारण बताउँदै एएफसीले सबैलाई पायक पर्ने ठाउँमा खेल गराउने तयारी गरिरहेको छ।

‘सहभागी देशमा कोभिड–१९ को बढ्दो प्रभाव र भ्रमण अवरोधका साथै क्वारेन्टिनका कारण तालिकामा फेरबदल भएको हो,’ एएफसीले जारी गरेको विज्ञप्तिमा भनिएको छ।

अब विश्वकप र एसिया कप छनोटका बाँकी खेल आयोजना गर्न एक साताभित्र एएफसीमा आवेदन दिनुपर्ने छ। यसबीच अष्ट्रेलियन मिडियाले नेपालसँगको खेल मार्च ३० बाट २०२१ को मध्यसम्ममा सर्न सक्ने उल्लेख गरेका छन्।

समूह बी मा रहेको अष्ट्रेलियाले नेपालसहित कुवेत, चाइनिज ताइपेइ र जोर्डनसँग पनि खेल्न बाँकी छ। यता नेपालले कुवेतविरुद्धको रिटर्न लेग भुटानमा खेलिसकेको छ। तर बाँकी खेलहरु खेल्न बाँकी छ।

समूह बी को चौथो स्थानमा रहेको नेपालले चाइनिज ताइपेइलाई हराएको छ भने पहिलो लेगको खेलमा अन्य सबै देशसँग पराजित भएको छ।