लिभरपुलको जित, युनाइटेडसँग बराबरीमा रोकियो चेल्सी

काठमाडौं - इंग्लिस प्रिमियर लिग (ईपीएल) अन्तर्गत आइतबार राति सम्पन्न खेलमा इंग्लिस क्लब लिभरपुलले सहज जित निकालेको छ।

डिफेन्डिङ च्यम्पियन लिभरपुलले शेफिल्ड युनाइटेडको मैदानमा घरेलु टिमविरुद्ध २–० गोलको जित निकालेको हो।

लिभरपुलको जितका लागि कर्टिस जोन्सले गोल गरे। पहिलो हाफको खेल बराबरीमा रोकिए पनि दोस्रो हाफको ४८ औं मिनेटमा गोल गर्दै जोन्सले अग्रता बनाएका थिए।

खेलको ६४ औं मिनेटमा शेफिल्डका कियन ब्रयनले आफ्नै पोस्टमा गोल गरेपछि लिभरपुलले दुई गोलको अग्रता बनायो। र, सोही नतिजाका साथ खेल जित्यो।

यससँगै लिरभपुलले लगातार चार खेलसम्मको हारशृंखला पनि तोडेको छ। यो जितबाट तीन अंक थप्दै ४३ अंक बनाएको लिभरपुल तालिकाको छैटौं स्थानमा छ।

पराजित शेफिल्ड युनाइटेड रेलिगेशन जोनको पुछारमा छ।

आइतबार रातिको अर्को खेलमा दोस्रो स्थानको म्यानचेस्टर युनाइटेड र पाँचौ स्थानको चेल्सीले गोलरहित बराबरी खेलेका छन्।

यसअघि पहिलो लेगको खेलमा पनि यी दुवै टिमले बराबरी खेलेका थिए।

यससँगै युनाइटेड पछिल्ला २० खेलमा ‘अनविटन’ छ। त्यस्तै चेल्सीमा नयाँ प्रशिक्षक थोमस टुचेल आएपछि चेल्स पनि अपराजित नै छ।

दोस्रो स्थानको युनाइटेड शीर्षस्थानको म्यानचेस्टर सिटीभन्दा १२ अंक पछि छ भने पाँचौ स्थानको चेल्सी १८ अंक पछि छ।

२६ खेलबाट ६२ अंक बनाएको सिटी १९ जित र पाँच बराबरीका साथ शीर्षस्थानमा छ।