शीर्षस्थानको सातदोबाटोसँग खुमलटारको अंक बराबरी

काठमाडौं- सहिद स्मारक बी डिभिजन लिगअन्तर्गत आज(आइतबार) सम्पन्न दोस्रो खेलमा खुमलटार युथ क्लबले साँघुरो जित निकालेको छ।

सातदोबोटोस्थित एन्फाको मैदानमा सम्पन्न खेलमा खुमलटारले झम्सिखेलविरुद्ध १–० गोलको जित निकालेको हो।

खुमलटारको जितका लागि महेश राईले निर्णायक गोल गरे। यो जितसँगै खुमलटारले शीर्षस्थानको सातदोबाटोसँग (समान १९) अंक बराबरी बनाएको छ।

तर हेड-टू-हेडमा सातदोबाटो अघि रहेकाले ऊ शीर्षस्थानमा छ। साथै सातदोबाटोले एक खेल कम खेलेको छ।
यता पराजित झम्सिखेल अंकतालिकाको १० औं स्थानमा छ।

आजको खेलपछि खुमलटार युथ क्लबका सहायक प्रशिक्षक विनोद ढंगोलले आशाअनुसारको प्रदर्शन नभएको बताएका छन्। गएको शुक्रबार सम्पन्न दबाबपूर्ण खेलमा खेलाडी थाकेका कारण आजको सुरुवाती खेल मात्र राम्रो भएको डंगोलको तर्क छ।

खुमलटारका प्रशिक्षक राजेश राईले पछिल्लो खेलमा डबल यल्लो कार्ड बेहोरेपछि उनी खेलमा उपस्थित थिएनन्।

त्यस्तै झम्सिखेलका प्रशिक्षक पुरुषोत्तम डंगोलले आजको खेल पचास–पचासको अवस्थामा रहेको बताएका छन्। ‘हामीले हाम्रो अवसर गुमायौँ, उनीहरुले गुमाएनन्,’ झम्सिखेलका प्रशिक्षक डंगोलले हारको कारणबारे भने।