तेस्रो हारसँगै नयाँबस्ती उपाधि होडमा कमजोर

काठमाडौं- सहिद स्मारक बी डिभिजन लिगमा नयाँ बस्ती युथ क्लब बोइज युनियनसँग पराजित भएको छ।

पराजित भएसँगै उसले स्थान सुधार गर्ने मौका पनि गुमाएको छ। हाल ११ अंकका साथ पाँचौ स्थानमा रहेको नयाँबस्तीलाई बोइज युनियलने ३-० गोलले हराएको हो।

सातदोबाटोस्थित एन्फा कम्प्लेक्समा सम्पन्न खेलमा बोइज युनियनको जितका लागि मिलन लिम्बूले ह्याट्रिक गरे।
उनले पहिलो हाफमा दुई र दोस्रो हाफमा एक गोल गर्दै ह्याट्रिक पुरा गरेका थिए।

प्रतिस्पर्धात्मक खेलको २१ औं मिनेटमा लिम्बूले गोल गर्दै सुरुवाती अग्रता दिलाएका थिए।

इन्ज्युरी समयमा गोल गर्दै उनले पहलो हाफमै २-० गोलको अग्रता कायम गरे। दोस्रो हाफको ५७ औं मिनेटमा लिम्बूले नै गोल गर्दै ह्याट्रिक पुरा गरे भने टिमलाई ३-० गोलको अग्रता दिलाए।

सोही अग्रताका साथ बोइज युनियनले खेल जित्यो। यो जितसँगै बोइज युनियन क्लबले आठ खेलबाट १४ अंक बनाएको छ। आजको खेलमा तीन अंक जोडे पनि ऊ चौथो स्थानमा यथावत् छ।

समूहको तेस्रो स्थानमा रहेको बाँसबारी क्लबको १५ अंक छ भने खुमलटार र सातदोबाटोको क्रमशः १६ र १९ अंक छ।
हिजो(शनिबार) सातौं चरणको खेला सकिएसँगै अंकतालिकाको पुछारमा रहेका पुल्चोक, मध्यपुर, झम्सिखेल र भगवती क्लबलको उपाधि यात्रा टुंगिइसकेको छ।

त्यस्तै, अंकतालिकाका अधारमा श्रीकुमारी, टुसाल, आरसीटीको उपाधि यात्रा कायम रहे पनि उनीहरुलाई जितको लयमा पुग्न कठिन देखिन्छ।