पार्टी एकता गर्न ओलीसँग वामदेवको प्रस्ताव

काठमाडौं– नेकपा एकता अभियानका संयोजक वामदेव गौतमले पार्टी एकताका लागि प्रधानमन्त्री केपी ओलीसँग प्रस्ताव गरेका छन्।

गौतमले प्रधानमन्त्री ओलीलाई शुक्रबार भेट गरी अब वामपन्थी शक्ति एकजुट हुनुको विकल्प नभएको भन्दै एकताको प्रस्ताव गरेका हुन्। 

गौतम  प्रधानमन्त्री ओलीलाई भेट्न दिउँसो बालुवाटार पुगेका थिए। ओली र गौतमबीच करिब डेढ घन्टा कुराकानी भएको गौतमका सहयोगी विश्वमणि सुवेदीले जानकारी दिए।

गौतम ओलीलाई भेट्न दिउँसो २ बजे बालुवाटार पुगेका थिए। पुस ५ गते प्रधानमन्त्री अ‍ोलीले प्रतिनिधिसभा विघटन गरेपछि नेकपा दुई समूहमा विभाजित छ। 

एउटा समूहको नेतृत्व पुष्पकमल दाहाल र माधवकुमार नेपालले गरेका छन् भने अर्को समूहको नेतृत्व प्रधानमन्त्री ओलीले गरेका छन्। 

गौतमले बिहीबार नेकपा–दाहाल नेपाल समूहका अध्यक्ष पुष्पकमल दाहाललाई भेट गरी एकताको प्रस्ताव राखेका थिए।