मिलान युरोपा लिगको प्रिक्वार्टरफाइनलमा, नापोली बाहिरियो

काठमाडौं – इटालियन क्लब एसी मिलान सर्बेर्ना ज्वेज्डलाई पछि पार्दै यूईएफए युरोपा लिगको अन्तिम १६ मा प्रवेश गरेको छ।

उसले सर्बियन क्लब सर्बेर्नालाई अवे गोलका आधारमा पछि पार्दै युरोपा लिगको अघिल्लो चरणमा प्रवेश पाएको हो।

फेब्रुअरी १८ मा सर्बेर्नाको मैदानमा सम्पन्न पहिलो लेगको खेलमा मिलानले २ गोल गरेको थियो भने घरेलु टिमले पनि समान २ गोल गरेको थियो।

त्यस्तै बिहीबार राति मिलानको मैदान सान सिरोमा सम्पन्न खेलमा १–१ गोलको बराबरी भएपछि समग्र नतिजा ३–३ गोल भएको थियो।

तर, मिलानले दुई अवे गोल र सर्बेर्नाले एकमात्र अवे गोल गरेपछि एसी मिलान युरोपा लिगको अन्तिम १६ मा प्रवेश गरेको हो।

युरोपा लिगमा होम गोलभन्दा अवे गोलको मान्यता धेरै हुने गरेको छ। र, बराबरी भएको अवस्थामा अवे गोलले धेरै मान्यता राख्ने हुनाले मिलान विजयी भएको हो।

यता अर्को इटालियन क्लब नापोली भने स्पेनिस क्लब ग्रानाडासँग पराजित हुँदै युरोपा लिगबाट बाहिरिएको छ।

नापोलीको घरेलु मैदान सन पावलो रंगशालामा सम्पन्न दोस्रो लेगको खेलमा उसले २–१ गोलको जित निकाले पनि समग्रमा ३–२ गोलले पछि पर्दै अन्तिम १६ मा पुग्नबाट वञ्चित भएको हो।

यसअघि ग्रानाडाको मैदानमा सम्पन्न खेलमा नापोलीले २–० गोलको हार बेहोर्दा घरेलु टिमले जित निकालेको थियो। यसकारण नापोलीलाई दोस्रो लेगमा एक गोलको अग्रता पर्याप्त थिएन।

तर, उसले दुई वा सोभन्दा धेरै गोलको अग्रता बनाउन नसक्दा अन्तिम १६ मा पुग्नबाट वञ्चित भएको हो।