पहिलो इनिङ : सस्तैमा समेटिए इङ्ल्यान्ड र इन्डिया

काठमाडौं- दुवै देशका ब्याट्स्मेन चल्न नसक्दा इन्डिया–इङ्ल्यान्डबीचको टेस्ट सिरिजअन्तर्गतको तेस्रो खेलमा आयोजक र पाहुना टिम सस्तैमा समेटिएका छन्।

आईसीसी विश्व टेस्ट च्याम्पियनसिपअन्तर्गत अहमदाबादको मोटेरा स्टेडियम (नरेन्द्र मोदी रंगशाला) मा जारी खेलको पहिलो इनिङमा इङ्ल्यान्डले ११२ रन बनाएको थियो भने इन्डियाले १४५ रन बनाएको हो।

टस जितेर ब्याटिङ राजेको इङ्ल्यान्डले ४८ ओभर ४ बलमा ११२ रन बनाउँदा ज्याक क्राउलीले सर्वाधिक ५३ रन जोडे। उनीबाहेर अन्य खेलाडीले सम्झनलायक प्रदर्शन गरेनन्।

यता घरेलु टिमका अक्षर पटेलले २१ ओभर चार बल बलिङ गर्दै मात्र ३८ रन खर्चिँदै ६ विकेट गिराए।
त्यस्तै रविचन्द्र अश्विनले तीन विकेट लिए।

पहिलो इनिङको जवाफी ब्याटिङमा आएको इन्डियाका लागि रोहित शर्माले सर्वाधिक ६६ रन हिर्काउनुबाहेक अन्य खेलाडीले गतिलो प्रदर्शन गरेनन्। कप्तान विराट कोहलीले भने २७ रन जोड्न सके।

५३ ओभर दुई बल खेलेको इन्डियालाई सस्तैमा रोक्न इङ्ल्यान्डका जोय रुटले पाँच र ज्याक लिचले ४ विकेट गिराए।