ओलीले राजीनामा दिने संकेत छैन : देउवा

काठमाडौं– नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीले पदबाट राजीनामा दिने स‌ंकेत नदेखिएकाे बताएका छन्।

महेन्द्रनारायण निधिको ९९ औं जन्मजयन्तीका अवसरमा आयोजित विचार गोष्ठीमा बोल्दै देउवाले ओलीले कि संसद्मा बहुमत सिद्ध गर्नु पर्ने कि राजीनामा दिनुपर्ने बताए।

देउवाले भने, ‘ओलीले राजीनामा दिनुहुन्छ जस्तो लाग्दैन। उहाँले कि संसद्मा बहुमत सिद्ध गर्न पर्‍यो कि राजीनामा दिनुपर्‍याे। यहाँभन्दा अर्को विकल्प छैन।’

उनले प्रधानमन्त्रीबाट राजीनामा आए अविश्वास प्रस्ताव पेस गर्नै नपर्ने बताए। देउवाले नेकपा फुटोस् भन्ने चाहना कांग्रेसको नहरेको बताए। उनले अब प्रतिनिधिसभा सशक्त भूमिका निर्वाह गर्नुपर्ने बताए।

 देउवाले कांग्रेसले केही गरेन भन्नेहरूले नै अहिलेको अवस्थामा कांग्रेसलाई खोजिरहेको बताए। अघिल्लो निर्वाचनमा मत नहाले पनि जनताले कांग्रेसबाट आशा राखेको उनको भनाइ छ। 

उनले अब पार्टी संसदीय दलको बैठक छिट्टै डाक्ने पनि बताए। उनले भने,  ‘हामीले पार्टीमा पनि सल्लाह गर्नुछ अब कसरी जाने भनेर। उनले प्रतिनिधिसभा विघटन बदर भएकाले खुसी हुनुपर्ने बताए।