महिला लिग : प्रतिष्ठाको लडाइँमा च्याम्पियन एपीएफको जित

काठमाडौं– दशरथ रंगशालामा दिनको दुई बजे सुरु भएको विभागीय डर्बी त्रिभुवन आर्मी क्लब र एपीएफबीचको खेल सकिएसँगै यो वर्षको लिग सम्पन्न भएको छ।

दुई खेल अगावै च्याम्प्यिन बनेको एपीएफले अन्तिम खेलमा पनि आर्मीलाई हराउँदा प्रष्ठिाको लडाइँमा पनि ऊ बलियो देखिएको छ।

एपीएफको जितका लागि सरु लिम्बूले दोहोरो गोल गरिन् भने फरवार्ड अनिता केसीले एक गोल गरिन्। पहिलो हाफको इन्ज्युरी समयमा केसीको पासमा गोल गर्दै लिम्बूले च्याम्पियन क्लबलाई अग्रता दिलाएकी थिइन्। त्यस्तै दोस्रो हाफको ८६ औं मिनेटमा केसीले गोल गरेपछि एपीएफले २–० गोलको अग्रता बनायो।

तर इन्ज्युरी समयमा सरुले व्यक्तिगत दोस्रो गोल थपेपछि एपीएफले ३–० गोलको जित निकाल्यो।

पहिलो लेगको खेलमा आर्मीविरुद्ध एपीएफले २–० गोलको जित निकालेको थियो। उक्त खेलमा अञ्जली योञ्जन र सरु लिम्बूले गोल गरेका थिए।

आजको खेलमा जित निकालेसँगै एपीएफ पूरा सिजनभर अपराजित रहँदै १२ खेलबाट पूर्ण ३६ अंक जोडेको छ। यता अन्तिम खेलमा पराजित आर्मीले २५ अंक जोडेको छ।

त्यस्तै १६ अंक बनाएको नेपाल पुलिस क्लब तालिकाको तेस्रो स्थानमा रहँदै लिगको अन्त्य गरेको छ।

यो सिजनमा एपीएफले ७६ गोल गरेको छ भने एकमात्र गोलको सामना गरेको छ।