शंकर पोखरेलको भविष्यवाणी, ‘रोल्पा र रुकुममा हामीले चुनाव जित्दैछौँ’

लुम्बिनी- प्रदेशका मुख्यमन्त्री शंकर पोखरेलले आगामी चुनाव रोल्पा र रुकुममा केपी ओली नेतृत्वको नेकपाले जित्ने भविष्यवाणी गरेका छन्।

बुटवलमा आयोजित जनसभालाई सम्बोधन गर्दै नेकपा ओली समूहका स्थायी कमिटी सदस्यसमेत रहेका पोखरेलले यसअघि तत्कालीन माओवादीले चुनाव जित्ने गरेको क्षेत्रमा अब ओली नेतृत्वको नेकपाले चुनाव जित्ने दाबी गरे।

उनले भने, ‘आज म तपाईँहरुलाई एउटा खुसीको खबर सुनाउन चाहन्छु, यसअघि प्रचण्ड नेतृत्वको माओवादीले चुनाव जित्ने गरेको रुकुम रोल्पामा अब ओली कमरेडको नेतृत्वमा हामीले चुनाव जित्दैछौँ।’

उनले आउने चुनावमा लुम्बिनी प्रदेशमा आगामी चुनाव ओली नेतृत्वको पार्टीले नै चुनाव जित्ने र अरु पार्टीलाई आफूहरुले आजै शिलान्याश गरेको केबलकारबाट हेर्नुपर्ने अवस्था आउने जिकिर गरे।

उनले ओली नेतृत्वको नेकपा नै आधिकारिक हुने बताए। उनले प्रथम अध्यक्ष केपी ओली र महासचिव विष्णु पौडेल जहाँ छन् त्यही नै आधिकारिक हुने बताए।