वर्ल्ड टेनिस टुरमा अभिलाषाको विजयी सुरुआत

काठमाडौं- नेपालकी अभिलाषा विष्टले आईटीएफ वर्ल्ड टेनिस टुर– जे ५ अन्तर्गत दोस्रो सर्किटको सिंगल्समा विजयी सुरुआत गरेकी छन्।

नेपाल टेनिस संघद्वारा आयोजित प्रतियोगिताको महिला सिंगल्समा अभिलाषाले सोमबार भारतकी सिद्धी खोतलाई ६–३ र ६–० को सोझो सेटमा पराजित गरिन्।

अभिलाषाले गत शनिबार सम्पन्न सर्किट १ को महिला डबल्समा जर्मनीकी सोन्जोसँग मिलेर स्वर्ण जितेकी थिइन्।

पुरुष सिंगल्समा नेपालका निसान श्रेष्ठ, निहाल जंगबहादुर थापा, आर्यन गिरी, प्रसिद्ध मोक्तान, आरभसम्राट हाडा, अकी जुवेन रावत र प्रणव मानन्धरले आ–आफ्नो प्रतिद्वन्द्वीसँग पराजय भोगे।

महिला सिंगल्समा नेपालका श्रेया भट्टराई, प्रकृति श्रेष्ठ, अजा रेग्मी, श्रृष्टि राई, इशाश्री शाह, रायना शाह र सर्वानी श्रेष्ठले आ–आफ्नो खेल गुमाए।

यु–१८ उमेर समूहको प्रतियोगितामा समान ३२–३२ पुरुष÷महिला खेलाडीले सिंगल्स र डबल्स स्पर्धामा प्रतिस्पर्धा गरिहेका छन्।

प्रतियोगितामा नेपाल, भारत, अमेरिका, क्यानाडा, स्पेन, फ्रान्स, बेल्जियम, फिनल्यान्ड, जर्मनी र उज्वेकिस्तान गरी १० राष्ट्रको सहभागिता रहेको प्रतियोगिताका निर्देशक अजय विष्टले जनाएका छन्। प्रतियोगिता शनिबार सम्पन्न हुनेछ।