एम्बाप्पेको गोलमा पीएसजीको जित, मार्सेल्लीका खेलाडीलाई रेडकार्ड

काठमाडौं – केलियन एम्बाप्पे र माउरो इकार्डीले गोल गर्दा पेरिस सेन्ट जर्मेन (पीएसजी)ले सहज जित निकालेको छ।

फ्रेन्च लिग वानअन्तर्गत मार्सेल्लीको मैदानमा सम्पन्न खेलमा पाहुना टिम पीएसजीले घरेलु टिमविरुद्ध २–० गोलको जित निकालेको हो।

खेलको नवौं मिनेटमा गोल गर्दै फरवार्ड केलियन एम्बाप्पेले पीएसजीलाई अग्रता दिलाएका थिए। त्यस्तै पहिलो हाफकै २४ औं मिनेटमा इकार्डीले गोल गर्दै अग्रतालाई दोब्बर बनाए।

यससँगै पहिलो हाफमै पीएसजी दुई गोलले अघि रह्यो। तर, दोस्रो हाफमा अतिरिक्त गोल नथपिएपछि साही नतिजाका साथ पीएसजीले खेल जितेको हो।

तर, खेलको अन्तिम मिनेटमा रेडकार्ड पाउँदै मार्सेल्लीका दमित्री पयेट मैदानबाट बाहिरिएका थिए। गएरातिको हारसँगै मार्सेल्लीले पीएसजीसँग लगातार आठ हाेम खेलमा हार बेहोरेको छ भने उसको क्यूएसआई युगमा १९ हार बेहोरेको छ।

यता गएरातिको जितसँगै ५१ अंक बनाएको पीएसजी शीर्षस्थानको लिल्लभन्दा तीन अंक पछि छ। त्यस्तै दोस्रो स्थानको लियोनको भने ५२ अंक छ। पराजित मार्सेल्ली ३३ अंकका साथ नवौं स्थानमा छ।

गएरातिको अर्को खेलमा लिल्लेले नान्टेसलाई २–० गोलले हराएको थियो।