लाफा राष्ट्रिय ब्याडमिन्टनको उपाधि पोखराका खड्का र अधिकारीको जोडीलाई

बुटवल - बुटवलमा सम्पन्न तेस्रो लाफा खुल्ला तथा भेट्रान्स पुरुष डबल ब्याडमिन्टन प्रतियोगिता २०७७ को उपाधि पोखराका विशाल खड्का र विधान अधिकारीको जोडीले चुमेको छ। 

शनिबार राति भएको फाइनल खेलमा बुटवलका विश्वास नेपाल र गणेश रायमाझीको जोडीलाई २–१ को सेटमा पराजित गर्दै उनीहरूको जोडीले उपाधि जितेको हो। 

नेपाल र रायमाझीको जोडी भने उपविजेतामै चित्त बुझायो। 

खुल्लातर्फ पोखराका विशाल बस्नेत र प्रनिशसिंह ठकुरी जोडी तथा लाफा समूहका सुशील गिरि र विवेक न्यौपानेको जोडी तेस्रो भए। 

खेलमा प्रथम, द्वितीय र तृतीय हुनेलाई क्रमशः ५५ हजार ५५५, ४१ हजार ५५५, ३१ हजार ५५५ रूपैयाँ, कप, मेडल र प्रमाणपत्रबाट पुरस्कृत गरिएको थियो। 

भेट्रान्सतर्फको खेलमा पाल्पाका वसन्त बज्राचार्य र महेश बज्राचार्यको जोडीले उपाधि हात पारेका छन्। 

फाइनल खेलमा गुल्मीका नवराज श्रेष्ठ र कृष्ण रानाको जोडीलाई २–० को सोझो सेटमा यो जोडीले पराजित गरेको थियो। 

भेट्रान्सतर्फ बुटवलका गोपाल टण्डन र अर्जुनबहादुर कार्की तथा शंकरनगरका पुरन गाहा र सुरज गुरुङको जोडी तेस्रो भए। 

खेलमा प्रथम, द्वितीय र तृतीय हुने जोडीहरू क्रमशः २५ हजार ५५५, १५ हजार ५५५, १० हजार ५५५ रूपैयाँ, कप, मेडल र प्रमाणपत्रबाट पुरस्कृत भए। 

प्रतियोगितामा गुल्मीका मनोज फौदार उदीयमान खेलाडी, दाङका हिमान्शु कँवर उत्कृष्ट खेलाडी, बुर्तिवाङका जेनिस शेरचन अनुशासित खेलाडी घोषित हँुदै नगद, कप, मेडल र प्रमाणपत्रबाट पुरस्कृत भए।