कैलालीमा माटोको ढिस्कोले पुरिएर ३ को मृत्यु, २ घाइते

काठमाडौं- कैलालीको पूर्वी क्षेत्र जानकी गाउँपालिकामा माटोको ढिस्कोले पुरिएर तीन जनाको मृत्यु भएको छ।

जिल्ला प्रहरी कार्यालय कैलालीका अनुसार जानकी गाउँपालिका–९ खैरीफाँटस्थित कालिका सामुदायिक वनमा माटो लिन गएका तीन जनाको पुरिएर मृत्यु भएको हो।

दुई जनाको घटनास्थलमा र एक जनाको टीकापुरस्थित अस्पतालमा उपचारका क्रममा मृत्यु भएको कैलालीका प्रहरी प्रवक्ता डीएसपी प्रतिक विष्टले जानकारी दिए।

मध्यान्ह १२ बजेको समयमा वन नजिकैको जैरी खोलामा उनीहरुलाई माटोको ढिस्कोले पुरेको थियो।

मृत्यु हुनेमा जानकी गाँउपालिका–९ की १७ की धनसरी सवाल, २० वर्षीया भावना वडको घटनास्थलमा नै मृत्यु भएको हो। यस्तै ३० वर्षीया गंगादेवी जैगडीको टिकापुर अस्पतालमा उपचारका क्रममा मृत्यु भएको हो।

१२ वर्षीया अन्जु जैगडी र १२ वर्षीया काजल सवाल घाइते भएका छन्। उनीहरुको अवस्था सामान्य रहेको प्रहरीले जनाएको छ।