८ दिनमा डेढ लाखभन्दा बढीले लगाए कोरोनाको खोप

काठमाडौं– नेपालमा १ लाख ५८ हजार ४८७ जनाले कोरोना भाइरसविरुद्धको खोप लगाएका छन्। 

स्वास्थ्य तथा जनसंख्या मन्त्रालयका अनुसार प्रदेश १ मा २१ हजार  ७५४, प्रदेश २ मा २१ हजार १८५, बागमतीमा ५५ हजार ५०४ जनाले खोप लगाइसकेका छन्। त्यस्तै गण्डकीमा १७ हजार २६७, लुम्बिनीमा २३ हजार ७९८, कर्णालीमा ८ हजार ७२ र सुदूरपश्चिम प्रदेशमा १० हजार ९०७ जनाले कोरोनाविरुद्धको खोप लगाएका छन्। 

कोरोनाविरुद्धको खोप लिनका लागि मापदण्डअनुसार नाम दर्ता गराएका समूहलाई मात्र खोप दिइएकोमा आज स्वास्थ्य मन्त्रालयले यस निर्णयलाई परिमार्जन गर्दै परिचयपत्रको आधारमा पनि स्वास्थ्यकर्मीलाई खोप दिने जनाएको छ।

मन्त्रालयले नाम दर्ता गर्न छुटेका स्वास्थ्यकर्मीले नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद, नेपाल फार्मेसी काउन्सिलको दर्ता प्रमाण पत्र र फोटोसहितको परिचय पत्र लिएर सम्बन्धित खोप केन्द्रमा गएर खोप लगाउन सकिने जनाएको छ। 

माघ १४ देखि सुरु भएको पहिलो चरणको खोप अभियान माघ २४ गतेसम्म चल्ने मन्त्रालयले जनाएको छ।