कार्यकर्ताले एमसीसी चाहिँदैन भनेपछि दाहालले रोके

काठमाडौं– नेकपाको दाहाल–नेपाल समूहले आज आमहड्तालको आह्वान गरेको छ। 

आन्दोलनको कार्यक्रम सफल बनाउन दुवै अध्यक्ष पुष्पकमल दाहाल र माधवकुमार नेपालसहितका नेताहरु राजधानीका सडकमा निस्किएका छन्।

दाहाल बिहीबार बिहान सातदोबाटामा सहभागी भए। त्यहाँबाट पुल्चोकमामा सहभागी हुन पुगेका उनले कार्यकर्ताले प्रतिगमन मुर्दाबाद भन्दै नाराबाजी गरेपछि उनले पनि नारा लगाएर समर्थन गरेका थिए।

स्थायी कमिटी सदस्य पम्फा भुसालको नेतृत्वमा प्रदर्शन भइरहेको थियो। त्यसै क्रममा कार्यकर्ताले एमसीसी चाहिँदैन भन्दै नारा लगाउन थाले। तर दाहालले पम्फा भुसाललाई सुटुक्कै यस्ताे नारा नलगाउन निर्देशन दिएका थिए। दाहालकाे यस्ताे निर्देशनपछि उक्त नारा लगाउन रोकिएको थियो। 

आमहडताल सफल पार्न दाहाल आफैं प्राडो गाडी चढेर अनुगमनमा निस्किएका थिए। उनले सर्वसाधारण नागरिकको आवागमन ठप्प पारेर आफू भने गाडीमा सवार भएर आन्दोलनमा निस्केको भन्दै सामाजिक सञ्जालमा विरोध भएको छ।