काठमाडौं मेयर कप चैत मसान्तभित्र हुने

काठमाडौं– काठमाडौंमा आयोजना हुने काठमाडौं मेयर कप आगामी चैत मसान्तभित्रमा हुने भएको छ। 

नेपाल क्रिकेट संघ (क्यान) र काठमाडौं महानगरले आज (मंगलबार) सम्झौतापत्रमा हस्ताक्षर गर्दै मेयर कपबारे निर्णय भएको जानकारी क्यानले दिएको छ।

प्रतियोगिताको जानकारी दिँदै क्यानले भनेको छ, ‘काठमाडौं महानगरपालिकासँग भएको सम्झौता अनुसार क्यानले ‘काठमाडौं मेयर कप २०७७’ चैत मसान्तभित्र सञ्चालन गर्नेछ।’

उक्त प्रतियोगिता सञ्चालनको लागि काठमाडौं महानगरले क्यानलाई ५० लाख रुपैयाँ उपलब्ध गराउने आयोजकले बताएको छ। साथै प्रतियोगिता एक दिवसीय फर्म्याटमा हुने क्यानले बताएको छ। ओमनमा हुने त्रिपक्षीय शृंखलाअघि नै प्रतियोगिता सम्पन्न गर्ने क्यानको लक्ष्य छ।

यसबाट थप नयाँ खेलाडीले मौका पाउने विश्वासका साथ प्रतियोगिता गर्न लागेको क्यानले जनाएको छ। तर प्रतियोगितामा कति टिम हुने र तालिका कस्तो हुने भन्ने निर्क्योल भइसकेको छैन।