चन्द्रपुरविरुद्ध वालिङको सहज जित

काठमाडौं – राष्ट्रिय महिला लिग फुटबलअन्तर्गत मंगलबार सम्पन्न खेलमा वालिङ नगरपालिका ३–० गोलले विजयी भएको छ।

सातदोबाटोस्थित एन्फा कम्प्लेक्समा भएको खेलमा चन्द्रपुर नगरपालिकामाथि वालिङले ३–० गोलको सहज जित निकालेको हो।

जितका लागि विदेशी खेलाडी मेथो रुथले दुई गोल गरिन् भने मिओमेग्ने डिजोमोले फ्रि किकमार्फत एक गोल गरिन्।

खेलको ३७ औं मिनेटमा गोल गर्दै रुथले वालिङलाई सुरुआती अग्रता दिलाएकी थिइन्। उनले नै पहिलो हाफको अन्त्यमा गोल गर्दा वालिङले दुई गोलको अग्रता बनाएको थियो।

दोस्रो हाफको ५३ औं मिनेटमा डिजोमोले उत्कृष्ट फ्रिकिक प्रहार गर्दै गोल गरिन्। यसका साथै तीन गोलको नतिजाले अघि रहेको वालिङले सोही नतिजाका साथ खेल जित्यो।

वालिङ नगर स्याङ्जा अंकतालिकाको चौथो स्थानमा उक्लिएको छ। त्यस्तै समान ८ अंक बनाएको पुलिस क्लब गोल डिफरेन्सका आधारमा अंकतालिकाको तेस्रो स्थानमा छ। 

तीन अंक जोडेको चन्द्रपुर छैटौं स्थानमा छ।