बाख्रापालनका लागि ५० महिलालाई अनुदान

कञ्चनपुर– विपन्न परिवारका महिलालाई आर्थिकरूपमा सवल बनाएर घरेलु हिंसा न्यूनीकरणमा सघाउनका लागि शुक्लाफाँटा नगरपालिकाका ५० महिलालाई बाख्रापालनका लागि अनुदान रकम उपलब्ध गराइएको छ।

नगरपालिकाको वडा नं २ र १२ का  महिलालाई सीप तथा व्यावसायिक विकासका लागि  बाख्रापालनसम्बन्धी सातदिने तालिम उपलब्ध गराई अनुदान रकम उपलब्ध गराइएको हो। 

तालिममा सहभागी भएका महिलालाई तीन हजारका दरले अनुदान रकम उपलब्ध गराइएको छ। आधा रकम नगरपालिकाको महिला शाखाले र आधा रकम तालिममा सहभागी महिलाले बाख्रापालनका लागि व्यहोर्ने सहमति गरिएको छ।

‘महिला आर्थिकरूपमा सक्षम भए घरेलु हिंसाका घटना कम हुन्छन्’, नगरपालिकाको महिला शाखाका प्रमुख कमला जोशीले भनिन्, ‘महिलालाई आर्थिकरूपमा सक्षम बनाउनकै लागि सातदिने तालिमसँगै अनुदान रकम उपलब्ध गराएका छौँ।’ नगरपालिकाको दुवै वडाका २५–२५ महिलालाई छुट्टाछुट्टैरूपमा तालिम प्रदान गरिएको उनले बताइन्।