महिला लिगमा पुलिससँग चन्द्रपुर स्तब्ध

काठमाडौं– जारी महिला लिग अन्तर्गत आज(आइतबार) सम्पन्न खेलमा विभागीय टोली नेपाल पुलिस क्लबले चन्द्रपुर नगरपालिकालाई हराएको छ। सातदोबाटोस्थित एन्फा कम्प्लेक्समा सम्पन्न खेलमा चन्द्रपुर पुलिससँग ३–१ गोलले पराजित भएको हो।

नेपाल पुलिसको जितका लागि निरु थापा, निर्मला बिके र अनुश्का शेर्पाले समान १–१ गोल गरे। खेलको २७ औं मिनेटमा गोल गर्दै निर्मलाले विभागीय टिमलाई अग्रता दिलाएकी थिइन्। तर ३९ औं मिनेटमा गोल गर्दै चन्द्रपुरकी सावित्रा राना मगरले निर्मलाको अग्रता तोडिन्।

यससँगै पहिलो हाफको खेल बराबरी भयो। दोस्रो हाफको ५० औं मिनेटमा निरुले गोल गर्दै पुलिसलाई पुनः अग्रता दिलाइन्।

निरुलाई विस्थापन गर्दै ७४ औं मिनेटमा मैदान छिरेकी अनुश्काले अतिरिक्त समयमा गोल गर्दै पुलिसलाई ३–१ गोलको जित दिलाइन्।

३–१ गोलको जितसँगै पुलिस अंतालिकाको दोस्रो स्थानमा उक्लिएको छ। उसले पाँच खेलबाट आठ अंक जोडेको छ।

समान पाँच खेलमा सहभागी भएको अर्को विभागीय टिम एपीएफ १५ अंकका साथ शीर्षस्थानमा छ। तेस्रो र चौथो स्थानमा रहेका त्रिभुवन आर्मी फुटबल क्लब र विराटनगरको समान ७–७ अंक छ।