संविधान र व्यवस्थामाथि गम्भीर प्रश्न चिह्न खडा भयो : कमल थापा 

काठमाडौं– राष्ट्रिय प्रजातन्त्र पार्टीका अध्यक्ष कमल थापाले संसद् विघटनपछिको अवस्थाले संविधान र व्यवस्थामाथि गम्भीर प्रश्न चिह्न खडा भएको बताएका छन्। 

जिल्ला अध्यक्षहरूसँगको भर्चुअल बैठकलाई शुक्रबार सम्बोधन गर्दै थापाले संसद् विघटनले मुलुकमा संकट गहिरिएर गएको र संवैधानिक जटिलता पैदा भएको बताएका हुन्। 

नयाँ नेपाल निर्माण, आमूल परिवर्तन र आर्थिक समृद्धिको लक्ष्य बोकेर भएको परिवर्तनले जनतामा सकारात्मक परिवर्तन दिन नसकेको थापाले बताए। 

उनले भने, ‘जनता भ्रष्टाचार, कुशासन, धर्म परिवर्तन, बेरोजगारी र सर्वसत्तावादको जातोमा पिसिनुपर्ने बाध्यात्मक अवस्था आएको छ।’ 

पार्टीको आगामी कार्यदिशा संगठन, जनसंघर्ष र महाधिवेशन भएको भन्दै थापाले विभाजनको पीडा अब कहिल्यै भोग्नु नपर्नेसमेत स्पष्ट पारे। 

पार्टीको भविष्यप्रति ढुक्क हुन आग्रह गर्दै थापाले आफूसहित पशुपतिशमशेर राणा र डा. प्रकाशचन्द्र लोहनीले ‘गीता’ छोएर पार्टी एकताको निमित्त प्रतिबद्ध भएकोले राप्रपालाई मुलुकको बलियो प्रजातान्त्रिक शक्ति बनाएर छाड्ने दृढता व्यक्त गरे। 

बैठकमा सचिवालय प्रमुखद्वय ध्रुबबहादुर प्रधान र भाष्कर भद्राले राप्रपाको विचार र एजेन्डालाई स्थापित गर्ने विषय अहिलेको प्रमुख मुद्दा भएको बताए। 

आजको बैठकमा ३१ जिल्लाका अध्यक्ष र प्रतिनिधिको सहभागिता रहेको सचिवालय सदस्य राजाराम बर्तौलाले जानकारी दिए।