आर्मीका महताराले जिते चौथो व्यास अल्ट्रा म्याराथनको उपाधि 

पोखरा– तनहुँको व्यास नगरपालिकाले आयोजना गरेको चौथो व्यास अल्ट्रा म्याराथनको उपाधि नेपाल आर्मीका देवराज महताराले हात पारेका छन्।

व्यास–५ मानुङकोटबाट सहिद स्मारक पार्क रहेको व्यास नगरपालिका–८ पुलिमराङसम्म ४४ किमी दुरी ३ घण्टा ३ मिनेट ५१ सेकेण्डमा पार गदै महतारा विजेता भएका हुन्।  

सोही दुरीलाई ३ घण्टा ८ मिनेट १ सेकेण्डमा पार गर्दै सोलुखुम्बुका सुमन कुलुङ दोस्रो भए। उनी प्रतियोगिताका पूर्व विजेता हुन्। 

३ घण्टा १० मिनेट ५ सेकेण्डमा उक्त दुरी पार गर्दै नेपाल आर्मीका वेदबहादुुर सुनुवार तेस्रो भए। 

हरेक वर्ष सहिद दिवसका अवसरमा व्यास नगरपालिकाले आयोजना गर्दै आइरहेको व्यास नगर अल्ट्रा म्याराथनमा यस वर्ष १३३ धावकको सहभागिता थियो। 

प्रतियोगितामा प्रथमलाई ८५ हजार ७७ रुपैयाँ, द्वितीयलाई ६५ हजार ७७ रुपैयाँ तथा तृतीयलाई  ५५ हजार ७७ रुपैयाँ पुरस्कार प्रदान गरिएको छ। 

४४ किमी उक्त म्याराथन मानुङकोट सिद्ध मार्ग हुँदै अलैचे–चापाघाट–अनसन चौतारी–सफासडक–भोर्लेटार चोक–बैरेनी–दुम्सी–कलेस्ती–पाथ्रा–सत्रसय–बानियाँ डिही–बर्लाची–सोतीवेशी–बगुवा रिस्ती–बाहुन पोखरा हुँदै पुलिमराङमा पुगेर सकिएको थियो।