१३ वर्षमा पनि बनेन राष्ट्रिय सहिद स्मारक

काठमाडौं– प्रजातन्त्र स्थापना एवं पुनःस्थापना तथा विभिन्न कालखण्डमा  स्वतन्त्रताका लागि जीवन आहूति दिने सहिदको सम्झनामा आज सहिद दिवस मनाइँदै छ।

विसं १९९७ माघ १० गते शुक्रराज शास्त्री, १३ गते धर्मभक्त माथेमा र गंगालाल श्रेष्ठ तथा १५ गते दशरथ चन्दलाई राणा शासकले मृत्युदण्ड दिएका थिए।

स्वतन्त्रताका आन्दोलनमा सहादत प्राप्त गर्ने सम्पूर्ण सहिदको सम्झनामा मन्त्रिपरिषदले विसं २०६४ जेठ ११ गते काठमाडौंको गोकर्णेश्वरमा ‘राष्ट्रिय सहिद स्मारक’ बनाउने निर्णय गरेको थियो। 

तर घोषणा भएको १३ वर्षमा पनि स्मारक बन्न सकेको छैन। स्मारकको भौतिक प्रगति ७० प्रतिशत र वित्तीय प्रगति ५८ प्रतिशत छ। 

गोकर्णको जगडोल (यज्ञडोल) सामुदायिक वनको ६५० रोपनी क्षेत्रफलमा शहिद संग्रहालय, अध्ययन अनुसन्धान गर्न चाहनेका लागि पुस्तकालयलगायत संरचनाको निर्माण अन्तिम चरणमा पुगेर निर्माण व्यवसायीको लापरवाहीले काम अलपत्र परेको स्मारक निर्माण समितिले जनाएको छ।

रासस