डिजिटल कक्षाका कारण झण्डै दोब्बरले बढ्यो मोबाइल आयात

काठमाडौं - चालू आर्थिक वर्षको ६ महिनामा २० अर्ब रूपैयाँ बढीको मोबाइल फोन आयात भएको छ। 

भन्सार विभागको तथ्यांकअनुसार चालू आर्थिक वर्षको साउनदेखि पुससम्म २० अर्ब ६३ करोड तीन लाख २२ हजार रूपैयाँ बराबरको मोबाइल फोन आयात भएको हो। 

उक्त आयात गत आर्थिक वर्षको सोही अवधिको तुलनामा झण्डै दोब्बरले बढी हो। गत आर्थिक वर्षको सोही अवधिमा  ११ अर्ब ७८ करोड ८५ लाख ४९ हजार रूपैयाँ बराबरको मोबाइल फोन आयात भएको थियो। 

कोरोना महामारीका कारण देश लकडाउनमा हुँदा अनलाइन कक्षा भएकाले मोबाइलको खपत बढेको र आयात पनि बढेको मोबाइल व्यवसायी बताउँछन्। 

मोबाइल एशोसिएसन अफ नेपालका संस्थापक अध्यक्ष पुरूषोत्तम बस्नेतले माग बढेपछि आयात पनि बढेको बताए। ‘स्मार्ट फोनमा मान्छेहरूको आकर्षण उसै पनि देखिन्थ्यो,’ उनले भने, ‘पछिल्लो समय डिजिटल कक्षा भएकाले पनि माग बढेको हुन सक्छ।’

चालू आर्थिक वर्षमा मोबाइल फोन आयातबापत् सरकारले तीन अर्ब २६ करोड ५० लाख ४६ हजार रूपैयाँ भन्सार राजस्व संकलन गरेको भन्सार विभागले जानकारी दिएको छ। गत आर्थिक वर्षको सोही अवधिमा एक अर्ब ८६ करोड ७४ लाख १४ हजार रूपैयाँ थियो।