‘सहिदहरूको बलिदानबाट प्राप्त उपलब्धिमाथि सरकारमै रहेकाहरूबाट खतरा’

काठमाडौं - गंगालाल श्रेष्ठले सहिद हुनुअघि जेलभित्रै गणेशमान सिंहलाई ‘डोन्ट फर्गेट माई ब्लड’ भनेको वाक्य अहिले थप ताजा भएर आएको सिंह पुत्र प्रकाशमानले बताएका छन्। 

सहिद दिवसको अवसरमा एक विज्ञप्ति जारी गर्दै कांग्रेस नेता प्रकाशमान सिंहले सहिदहरूको बलिदानकै कारण आज निर्वाध नागरिक अधिकारको प्रयोग गर्न पाएको बताएका छन्।

‘स्वतन्त्रताको लामो श्वास फेर्न पाइरहेका छौं। देश नै बन्द कठघराजस्तो रहेका बेला प्रजातन्त्र, नागरिक अधिकार र स्वतन्त्रताका लागि लड्दालड्दै सहिद हुनुभएका गंगालाल श्रेष्ठ, धर्मभक्त माथेमा, शुक्रराज शास्त्री र दशरथ चन्द सधैँ नेपालीको मनमुटुमा रहिरहनु हुनेछ,’ विज्ञप्तिमार्फत् उनले भनेका छन्। 

सहिदहरूको बलिदानबाट प्राप्त उपलब्धिमाथि अहिले सरकारमै रहेकाहरूबाट खतरा देखिएको उनको भनाइ छ। 

‘सहिदको बलिदानबाट प्राप्त उपलब्धिमाथि धावा बोल्ने केपी ओली प्रवृत्तिविरूद्ध अहिले एक भएर लड्नुपर्ने अवस्था छ,’ उनले भनेका छन्, ‘अझै पनि सहिदहरूले देख्नुभएको सपना साकार हुन बाँकी छ। सहिदले देखेका सपना सार्थक बनाउने सामर्थ्य हामीलाई प्राप्त हुन सकोस्। नागरिकका अधिकार पूर्ण स्थापित गर्न, जनताको जीवनस्तर उठाउन र देशलाई समृद्ध बनाउनुपर्ने काममा इमान्दार भएर लाग्न पनि यो दिनले हामी सबैलाई उत्प्रेरित गर्न सकोस्।’