पछिल्लो २४ घण्टामा कोरोनाले लिएन कसैको ज्यान

काठमाडौं– स्वास्थ्य तथा जनसंख्या मन्त्रालयले पछिल्लो २४ घण्टामा नेपालमा कोरोना संक्रमितको मृत्यु नभएको जनाएको छ। 

नेपालमा पहिलोपटक जेठ ३ गते सिन्धुपाल्चोककी महिलाको कोरोना संक्रमणबाट मृत्यु भएको थियो। 

साउन २० देखि दैनिक रुपमा कोरोना संक्रमितको मृत्यु हुँदै आएको मन्त्रालयको विवरणमा उल्लेख छ। झन्डै ६ महिनापछि बिहीबार मन्त्रालयको विवरणमा कोरोना संक्रमणबाट मृत्यु हुनेको संख्या शून्य देखाइएको छ। साउन २० गतेसम्म ५८ जनाकाे मृत्यु भएकाे थियाे। त्यसयता एक हजार ९६२ जनाकाे मृत्यु भएकाे छ।

स्वास्थ्य तथा जनसंख्या मन्त्रालयका अनुसार कोरोना संक्रमणका कारण नेपालमा दुई हजार २० जनाको मृत्यु भएको छ। 

पछिल्लो २४ घण्टामा देशभर थप २१३ जनामा कोरोना भाइरस संक्रमण पुष्टि भएको छ। सोही अवधिमा देशभरबाट थप २९६ जना संक्रमणमुक्त भएका छन्। 

नेपालमा कुल संक्रमितको संख्या दुई लाख ७० हजार ५८८ पुगेको छ भने कोरोनामुक्त हुनेको संख्या दुई लाख ६५ हजार ३६५ पुगेको छ। देशभर सक्रिय संक्रमितको संख्या तीन हजार २०३ रहेको मन्त्रालयको विवरणमा उल्लेख छ।