बाटो किनारमा सुतेका मजदुरमाथि ट्रक चल्दा भारतमा १५ जनाको मृत्यु

काठमाडौं– भारतको गुजरात राज्यको सुरतमा मंगलबार बिहान ठूलो दुर्घटना भएको छ। 

सुरतमा बाटो किनारमा सुतिरहेका आप्रवासी कामदारमाथि एउटा ट्रक गुड्दा  १५ जनाको ज्यान गएको त्यहाँको प्रहरीलाई उद्धृत गर्दै इण्डियन एक्सप्रेसले जनाएको छ। 

तीव्र गतिको ट्रक बाटोको किनारमा सुतिरहेका आप्रवासी कामदारमाथि कुदेपछि उक्त घटना भएको हो।  

सुरतबाट झण्डै ६० किलोमिटर टाढा रहेको कोसाम्बा गाउँमा यो घटना भएको हो। ज्यान गुमाउने सबै राजस्थानका कामदार रहेको बताइएको छ।  

किम–माण्डवी सडकको छेउमा सुतेका कामदारमाथि ट्रक गुड्दा भएको दुर्घटनामा ज्यान गुमाउनेका परिवारलाई २ लाख र घाइतेलाई ५० हजार क्षतिपूर्ति दिने भारतका प्रधानमन्त्री नरेन्द्र मोदीले घोषणा गरेका छन्। उनले घटनाप्रति दुःख व्यक्त गर्दै ट्वीटरमार्फत उक्त घोषणा गरेका हुन। 

१२ जनाको घटनास्थलमै ज्यान गएको थियो भने तीनजनाको अस्पतालमा उपचारको क्रममा ज्यान गएको भारतीय मिडियाले जनाएका छन्।  पाँच जना घाइतेको  स्थानीय अस्पतालमा उपचार भइरहेको छ। ट्रकका चालक पक्राउ परेका छन्।