ट्रम्पलाई प्रतिबन्ध लगाउँदा खुसी छैन ट्विटर

एजेन्सी- अमेरिकी राष्ट्रपति डोनल्ड ट्रम्पलाई ट्विटरले स्थायी प्रतिबन्ध लगाएको छ। तर ट्रम्पलाई स्थायी प्रतिबन्ध लगाउने निर्णयले ट्विटरमा कुनै उत्साह भने नरहेको यसका संस्थापक ज्याक डोर्सीले बताएका छन्।

उनले ट्विटरमार्फत् यो जानकारी गराएका हुन्।

उनले भनेका छन्, ‘ट्रम्पलाई ट्विटरमा प्रतिबन्ध लगाउनु सही निर्णय थियो। तर यस्तो निर्णय लिनुपर्दा दुःख लागेको छ। असाधारण र अपरिहार्य अवस्था आएपछि ट्रम्पको ट्विटर अकाउन्ट स्थायी रुपमा निलम्बित गर्नुपर्‍यो।’

डोर्सीले ट्विटरमा ट्रम्पलाई प्रतिबन्ध लगाउँदा एउटा स्वास्थ बहस हुन नसकेको भन्दै त्यसमा आफूहरु असफल भएको बताएका छन्।

ट्रम्पको अकाउन्ट बन्द गर्दा ट्विटरको आलोचना र प्रशांसा दुबै भइरहेको छ। जर्मन चान्सलर एंगेला मर्केल र मेक्सिकोका राष्ट्रपति एन्ड्रेस म्यानुअल लोपेज ओब्रेडोरले ट्विटरको कदमको विरोध गरेका थिए।

उनीहरु दुबैजना ट्रम्पका नजिकका मित्र मानिन्छन्।

ट्विटर प्रमुख ज्याक डोर्सीले विभिन्न ट्वीटहरुमार्फत् स्पष्टिकरण दिँदै क्यापिटोल हिलमा भएको अपराधिक कर्मको जिम्मेवार ट्रम्प भएका कारण यो कदम चाल्नु परेको बताएका छन्।

उनले भनेका छन्, ‘ट्रम्पलाई पहिले पनि चेतावनी दिइसकिएको छ, उहाँले बेवास्ता गरेपछि यो निर्णय लिनुपरेको हो। हामीसँग सुरक्षाको विषयमा गम्भीर सूचना आएपछि ट्रम्पको अकाउन्ट स्थायी रुपमा बन्द गरिएको हो।’