चुनावी गतिविधि रोक्न माग गर्दै दाहाल–नेपाल पुगे निर्वाचन आयोग

काठमाडौं। नेपाल कम्युनिष्ट पार्टी (नेकपा) दाहाल-नेपाल समूहका अध्यक्षद्वय पुष्पकमल दाहाल र माधवकुमार नेपाल निर्वाचन आयोग पुगेका छन्। 

नेकपाको आधिकारिकता विवाद टुंगोमा नपुगेका बेला चुनावी गतिविधि रोक्न माग गर्दै उनीहरू आयोग पुगेका हुन्। 

आयोगमा अहिले छलफल जारी छ।

छलफलमा दाहाल-नेपालसहित नेताहरू लीलामणि पोखरेल, मुक्ति प्रधान, कृष्ण भक्त पोखरेल, सुरेन्द्र पाण्डे, रामनाथ विडारीलगायत सहभागी छन्।

केही दिनअघि आयोगले नेकपाको आधिकारिकता दाबी पेस गर्न सात दिनको समय दिएको थियो। 

आफूहरू निर्वाचन आयोगमा छलफलका लागि आएको स्थायी कमिटी सदस्य लीलामणि पोखरेलले जानकारी दिए।

प्रतिनिधिसभा विघटन गर्दै सरकारले निर्वाचनको मिति २०७८ वैशाख १७ र २७ गतेलाई तोकेको छ। 

सोहीअनुसार निर्वाचन आयोगले निर्वाचनको तयारी गरिरहेको छ। 

गृहमन्त्री रामबहादुर थापाले पनि वैशाखमा हुने निर्वाचनको तयारीमा जुट्न नेपाल प्रहरीलाई निर्देशन दिइसकेका छन्। 

सरकारले पुस ५ गते प्रतिनिधिसभा विघटन सिफारिसको निर्णय गर्दै निर्वाचनको मिति तोकेर राष्ट्रपति समक्ष पेस गरेको थियो। 

प्रतिनिधिसभा विघटनपछि नेकपा राजनीतिकरूपमा विभाजित भएको छ। 

दाहाल-नेपाल र ओली समूहले छुट्टाछुट्टै भेला तथा बैठकहरू गर्दै आएका छन्। 

नेकपाको नाम र चुनाव चिह्न दुवै समूहले आफ्नो भएको दाबी गर्दै आएका छन्।