एजेन्सी- अमेरिकी संसदले राष्ट्रपतीय चुनावमा जो बाइडेनले प्राप्त गरेको विजयलाई आधिकारिकता प्रदान गरेको छ।
पेनसिलभेनिया र एरिजोनामा मतगणनाको विषयलाई लिएर भएको आशंका अमेरिकाका दुबै सदनले खारेज गरिदिएका छन्।
योसँगै राष्ट्रपतिमा जो बाइडेन र उपराष्ट्रपतिमा कमला ह्यारिसको जितले आधिकारिकता प्राप्त गरेको हो।
बाइडेनलाई ३०६ इलेक्टोरल कलेज प्राप्त भएको छ। उनलाई जितका लागि २७० मतको आवश्यकता थियो।
अमेरिकी चुनावको नतिजा पुष्टि संसदबाट हुन्छ। यही पुष्टि गर्न बसेको हिजोको संसद बैठकमा राष्ट्रपति डोनल्ड ट्रम्पका समर्थकहरुले हिंस्रक आक्रमण गरेका थिए।
उनीहरुमाथि प्रहरीले कारबाही चलाएको छ। झडपका क्रममा चार जनाको मृत्यु भएको छ। राजधानी वासिंटन डिसीमा १५ दिनका लागि संकटकाल घोषणा गरिएको छ।