डोल्पाका दुई कोरोना संक्रमितको हेलिकोप्टरबाट उद्धार

सुर्खेत- डोल्पाबाट आज (शुक्रबार) दिँउसो दुई जना कोरोना संक्रमितलाई हेलिकोप्टरबाट उद्धार गरिएको छ।

संक्रमितको अवस्था जटिल भएपछि उपचारका लागि काठमाडौं हेलिकोप्टरबाट उद्धार गरी काठमाडौं लगिएको छ।

संक्रमित ठूलोभेरी नगरपालिकाका ६० वर्षीय र ५४ वर्षीय पुरुष हुन्। ६० वर्षीय पुरुष वडाध्यक्ष र ५४ वर्षीय पुरुष शिक्षक हुन्। दुबै जनालाई केही दिन अघिमात्रै कोरोना संक्रमण पुष्टि भएको थियो।

डोल्पाका कोरोना फोकलपर्सन ठेकबहादुर गुरुङका अनुसार जिल्लामा भेन्टिलेटर र आईसीयु सेवा नभएपछि संक्रमितलाई काठमाडौं पठाउनु परेको हो।

‘दुबै जनाको अवस्था जटिल थियो, जिल्लामा उपचार सम्भव नभएपछि काठमाडौँ पठाएका छौँ’ गुरुङले भने, ‘अस्पतालमा आईसीयू र भेन्टिलेटर सेवा छैन, जटिल संक्रमितहरु बाहिरै पठाउनुपर्छ।’

कोरोना संक्रमितको उपचारका लागि अस्पतालमा भेन्टिलेटर र आईसीयु उपकरण पुगेका छन् तर अक्सिजन छैन। अक्सिजन प्लान्ट निर्माणको लागि ठेक्का प्रक्रिया सुरु गरिएको छ।

डोल्पामा हालसम्म १५ जनामा कोरोना पुष्टि भएको छ। संक्रमितमध्ये ६ जना कोरोना मुक्त भएका छन्। लामो समय कोरोना मुक्त रहेको डोल्पामा पछिल्लो समय संक्रमितहरु बढ्न थालेका छन्।