कोरोनाविरुद्धको खोप ल्याउने जिम्मा निजी क्षेत्रलाई दिँदै छौं : प्रधानमन्त्री 

काठमाडौं– सरकारले निजी क्षेत्रलाई कोरोना भाइरसविरुद्धको खोप आपूर्तिका लागि अनुमति दिने तयारी गरेको छ। 

प्रधानमन्त्री केपी शर्मा ओलीले ‘बालबालिकासँग प्रधानमन्त्री’ कार्यक्रमलाई सम्बोधन गर्दै खोप आपूर्तिको अनुमति निजी क्षेत्रलाई दिन लागिएको जानकारी दिएका हुन्। 

प्रधानमन्त्री ओलीले खोप छिटोभन्दा छिटो ल्याई सबैभन्दा पहिले अग्रपंक्तिमा रहेका स्वास्थ्यकर्मी, सुरक्षाकर्मी र जेष्ठ नागरिकलाई दिइने बताए। 

उनले खोप ल्याउन सरकार गम्भीरताका साथ लागेको पनि  बताए। 

बालबालिकाको स्वास्थ्यलाई ध्यानमा राखेर विद्यालय सञ्चालन यथावत् रुपमा गर्न नसकेको प्रधानमन्त्री ओलीको भनाइ छ। 
कोभिड–१९ विरुद्धको खोप खरिदका लागि तीनवटा ढाँचामा  काम गरिरहेको छ। 

स्वास्थ्य तथा जनसंख्या मन्त्रालयले कोभिडविरुद्ध खाेप ल्याउन सरकार टु सरकार, सरकार टु कम्पनी र निजी क्षेत्रलाई मान्यता दिने नीतिगत तयारी गरिरहेको छ। 

प्रधानमन्त्री ओलीले कोभ्याक्सबाहेक  खाेप उत्पादक देश, उत्पादक कम्पनीसँग सीधै खरिद गर्न सक्ने विषयमा छलफल भइरहेको जानकारी दिए।