राजविराजमा विद्युत चोरी गर्ने ४२ जनालाई कारबाही, ३ लाख राजश्व संकलन

सप्तरी- नेपाल विद्युत् प्राधिकरण वितरण केन्द्र राजविराजले विद्युत् चोरीमा संलग्न ४२ जनालाई कारबाही गरेको छ।

हुकिङ गरी विद्युत् चोरी गरिरहेको अवस्थामा विद्युतीय सामग्री सहित ४२ जनालाई कारबाही गरिएको प्राधिकरणका इञ्जिनीयर विमलप्रसाद साहले जानकारी दिए।

प्राधिकरणका कर्मचारी तथा प्रहरीको सहयोगमा विद्युत चोरी गरिरहेका घरधनीहरुको टिभी, फ्रिज, पंखा, पानी तान्ने मोटर, तार, कटर लगायतका १४० थान विद्युतीय उपकरण बरामद गरिएको हो।

उनीहरुबाट ३ लाख २ हजार ५४९ रुपैयाँ राजस्व संकलन गरिएको इञ्जिनीयर साहले बताए। उनका अनुसार विद्युत् चोरीमा संलग्नलाई न्यूनतम ३ हजारदेखि विद्युत् खपत गरेको युनिटको आधारमा थप जरिबाना गरिएको छ।

यस अवधिमा ५० लाखभन्दा बढी बक्यौता पनि उठाइएको छ। समयमै महसुल नबुझाउने १४० ग्राहकको लाइन यस अवधिमा काटिएकोमा १२७ जनाबाट रु. ५७ लाख २४ हजार ८५३ असुली भएको प्राधिकरणले जनाएको छ।

हाल नेपाल विद्युत् प्राधिकरण वितरण केन्द्र राजविराजअन्तर्गत कूल ५१ हजार ९८७ ग्राहकहरु छन्।