विदेशी चलखेल सह्य छैन : लोहनी

काठमाडौं– राष्ट्रिय प्रजातन्त्र पार्टीका अध्यक्ष प्रकाशचन्द्र लोहनीले नेपालमा अस्थिरता निम्तन थालेपछि विदेशी मित्रराष्ट्रहरूको पनि चलखेल बढेको बताएका छन्। 

‘देशमा अस्थिरता हुन थाल्यो। घरझगडा मिलाउन दर्जनौं आउन थाले,’ पूर्वपराष्ट्रमन्त्रीसमेत रहेका लोहनीले भने, ‘चाहे उत्तरका हुन् चाहे दक्षिणका हुन उनीहरुको चलखेल नेपाल र नेपालीहरुका लागि सह्य होइन।’

उनले सत्तामा बस्नेको भ्रष्टाचार, बेइमानी र नियतले मुलुकमा राजनीतिक संकट देखा परेको बताए।

काठमाडौंको रत्नवाटिकामा राप्रपाको बृहत् जनप्रदर्शन कार्यक्रमलाई सम्बोधन गर्दै उनले मुलुकमा अहिले व्यापक भ्रष्टाचार बढेको बताए। 

नेपाली जनताको दुःखमा बोल्ने शक्ति देशमा नभएको भन्दै उनले राप्रपा नेपाली जनताको दुःखमा साथ दिनका लागि अघि बढेको बताए।

‘दरबारबाट पत्रकार सम्मेलन गरेर नेपाली जनताको हित हुन्छ भने म बाहिर जान्छु भनेर छोडेर हिँड्ने संस्था भनेकै राजसंस्था हो,’ उनले भने, ‘आज राजसंस्था चाहिन्छ। म अरु पार्टीका साथीहरुलाई पनि भन्न चाहन्छु।

नेपालको अहिलेको आवश्यकता भनेको शासन गर्ने नभई सबै नेपालीलाइ समेटेर राख्ने राजसंस्थाको आवश्यकता भएको उनको भनाइ छ। 

लाेहनीले आफ्नो पूर्वाग्रह त्यागेर देश र जनताको हितलाई हेरेर त्यसलाई छोड्ने संस्थाका रुपमा राजसंस्थालाई ध्यानमा दिएर अघि बढ्न पनि आग्रह गरे।