पीएम कप महिला क्रिकेटको सेमिफाइनल समीकरण पूरा

काठमाडौं– दाङको लमहीमा जारी प्रधामन्त्री (पीएम) कप महिला क्रिकेट प्रतियोगिताको सेमिफाइनल समीकरण पूरा भएको छ।

आज (बिहीबार) समूह चरणको अन्तिम खेलमा प्रदेश १ ले गण्डकीविरुद्ध सानदार जित निकालेसँगै सेमिफाइनल समीकरण पूरा भएको हो।

प्रतियोगितामा सम्मिलित आठ टिमलाई नेपाल क्रिकेट संघ (क्यान)ले दुई समूहमा बाँडेर खेल गराएको थियो।

समूह ए अन्तर्गत सशस्त्र प्रहरीको विभागीय टिम एपीएफ, लुम्बिनी प्रदेश, कर्णाली प्रदेश र प्रदेश २ थिए। त्यस्तै समूह बी अन्तर्गत प्रदेश १, सुदूरपश्चिम प्रदेश, बागमती प्रदेश र गण्डकी प्रदेश थिए।

सिंगल राउन्ड रोबिन शैलीमा सञ्चालित समूह चरणको खेलबाट सतप्रतिशत जित निकाल्दै एपीएफ समूह ए को विजेता बनेको छ भने एक खेलमा हार बेहोरेको लुम्बिनी उक्त समूहको उपविजेता छ। प्रदेश २ र कर्णाली बाहिरिसकेका छन्।

यता समूह बी तर्फ लगातार तीन जित निकाल्दै प्रदेश १ समूह विजेता बनेको छ भने एक खेलमा हार बेहोरेको सुदूरपश्चिम समूहको दोस्रो स्थानमा छ। गण्डकी र बागमती भने बाहिरिसकेका छन्।

समूह चरणका खेल सकिएपछि समूह ए बाट एपीएफ र लुम्बिनीले सेमिफाइनल खेल्ने टुंगो लागिसकेको थियो। त्यस्तै आज समूह बी अन्तर्गतका खेल सम्पन्न भएसँगै प्रदेश १ र सुदूरपश्चिमले सेमिफाइनल खेल्ने टुंगो लागेको छ।

समूह ए को विजेता एपीएफले अब समूह बीको उपविजेता सुदूरपश्चिम प्रदेशसँग खेल्नेछ। त्यस्तै, समूह बीको विजेता प्रदेश १ ले समूह एको उपविजेता लुम्बिनी प्रदेशसँग खेल्नेछ।

पीएम कपको सेमिफाइनलका दुवै खेल पर्सी (पुस १८ गते) हुनेछ। जहाँ बिहानको खेलमा एपीएफले सुदूरपश्चिमसँग खेल्नेछ।

सोही दिन दिउँसोको दोस्रो सेमिफाइनल खेलमा प्रदेश १ ले लुम्बिनी प्रदेशसँग खेल्नेछ। फाइनल खेल पुस १९ गते दिउँसो ११ बजे सुरु हुनेछ।