पीएम कप क्रिकेट : बागमतीलाई हराउँदै सुदूरपश्चिम सेमिफाइनलमा

काठमाडौं– मौसमले प्रभावित बनाएको खेलमा बागमती प्रदेशलाई पराजित गर्दै सुदूरपश्चिम प्रदेश प्रधानमन्त्री कप महिला टी–२० क्रिकेटको सेमिफाइनलमा प्रवेश गरेको छ।

सुदूरपश्चिमले बागमतीलाई २८ रनले हराएको हो। प्रतिकूल मौसमका कारण ११ ओभरमा छोट्याइएको खेलमा टस जितेर ब्याटिङ राजेको सुदूरपश्चिमले चार विकेटको क्षतिमा ७६ रन जोडेको थियो।

७७ रनको लक्ष्यका साथ मैदान छिरेको बागमती पूरा ओभर खेलेर ४८ रनमै समेटिएपछि खेल सुदूरपश्चिमले जित्यो। सुदूरपश्चिमका लागि कविता कुँवरले १९ रन बनाइन् भने डोल्ली भट्ट सर्वाधिक २८ रन जोड्दै अविजित रहिन्। निर्धारित लक्ष्यका लागि कविता जोशीले १२ रन बनाउँदा सुदूरपश्चिमलाई अतिरिक्त १० रन प्राप्त भयो।

बागमतीका लागि आरती विडारीले तीन र निशा तामाङले एक विकेट लिए। जवाफी ब्याटिङमा आएको बागमतीकी सुमन खतिवडाले २७ रन बनाउनुबाहेक अन्य खेलाडीले सम्झनलायक प्रदर्शन गरेनन्।

प्लेयर अफ दि म्याच बनेकी सुदूरपश्चिमकी कविता जोशीले पाँच विकेट गिराइन् भने कविता कुँवर, रितु कनौजिया र लक्ष्मी साउदले १–१ विकेट लिए।

जितसहित सुदूरपश्चिमले अंकतालिकामा चार अंक बनाएको छ। चार अंकसहित ऊ सेमिफाइनलमा प्रवेश गरेको हो। समूह बीको शीर्षस्थानमा रहेको प्रदेश १ ले आजै हुने दोस्रो खेलमा जितविहीन गण्डकी प्रदेशको सामना गर्नेछ। उसले एक खेल अगावै सेमिफाइनल प्रवेश पाइसकेको छ।

समूह बी का दुवै खेलमा पराजित हुँदै गण्डकी प्रतियोगिताबाट बाहिरिसकेको छ। त्यस्तै आजको पहिलो खेलमा दोस्रो हार बेहोरेपछि दुई अंक बनाएको बागमती पनि बाहिरिएको छ।